شعراء بلدي 3

كتبها  علاء دياب ، في 22 مارس 2010 الساعة: 14:00 م

نبع الحنـــــــان

شعر بالعامية للأستاذ / محمد علي عرفة

كانت فرحتي شديدة عندما التقيت بأستاذي الفاضل الأستاذ / محمد علي عرفه

قبيل عيد الأم ، تجاذبنا أطراف الحديث ، وكم هو رائع أن تتحدث مع أستاذك وتتذكر أيام جميلة مضت .. تذكرت قصيدته العامية عن الأم والتي كنت قد نوهت عنها في حديث سابق ، وحكى لي كيف خرجت هذه القصيدة من محراب الشعر إلى قلب الأم  .. وقررت أن أهديها لكم على صفحات مدونتي

فهي أجمل هدية لكل أم في عيدها

قصيدة نبع الحنان

للأستاذ الكبير والمربي الفاضل

الأستاذ / محمد علي عرفة

أحلى حروف قلتها	هي الألف والميم
والياء .. وفي جمعها	لحن وفيه تنغيم
أمي بقولها وقلبي	فوق السحاب بيهيم
أمي بقولها وسمعي	مليان غُنا وترانيم

***

أمي يا نبع الحنان	يا بلسمي الشافي
يا ضلة وأنا حران	رمشك غطا كتافي
وأنتي مدى الأزمان	نبع الوفا الصافي
أعطاكِ رب العباد	رحمة وحنان دافي

***

نور الصباح الجميل	في بسمتك بيطل
أحلى معاني السماح	جوا عنيكي تهل
خليتي عمري ربيع	مكسي بعيدان الفل
أنتي العطا والغطا	وأنتي ست الكل

***

أنا لما كنت لسه جوا أحلامك …. مليتي بيَّا أيامك

رسمتي جوا وجدانك …….. أحلى صورة

تتباهي بيها وسط خلانك

***

وعاوزه الدنيا تسمع لك … عشاني عشتي ايامك

ولما الرب هناكي وأعطاكي

وسكنت أنا بقدرته جوا حشاكي

مليتي الدنيا بالفرحة وهنَّاكي ..

 أبويا وقال : أنتي لابد ترتاحي

***

وفين الراحة يا أمي …. بعد ما بدا همي

بديتي تفكري في اسمي … وإيه راح يكون رسمي

وإيدك صاحيه بتخيط جلابيه

وصوتك الحنون دندن بأغنيه

كأني خلاص بقيت موجود وقدامك

ومش حاجه في علم الغيب مخبيه

قعدتي تفرشي سريري … وقال عليا بتغيري

من الأولاد … من الحساد …. وترقيني بحنيه

***

دا كله في الخيال لسه …. وأنتي بالأم حاسه

وتتمني الألم ألمين … وكل همك أطلع لك

تقولي بس إمتى .. وفين ؟!

وأنا ساكن في قصر ملان بالرحمه

لا حر … لا برد .. لا ضوضاء ولا زحمه

يجيني الأكل في ميعاده بلا تأخير

تقوم الدنيا أو تقعد مافيش تأثير

أسبب لك الم دايم في تسع شهور

كأن رحاية جواكي تدور وتدور

وكل ما زاد يكبر في عنيكي النور

لحد ما يوم ولدتيني … حضنتيني

بروح مليانه حنيه .. وهنا وسرور

***

كلام الدنيا ما يكفيش … لوصف الفرحه جواكي

في يوم ميلادي يا أمي .. فرح الدنيا ما كفاكي

نسيتي الدنيا علشاني … وبعترتي الهنا جنبي

وكل ما حد يا أمي … يجيكي يبص ويهني

تصلي على النبي الهادي … وتتمني

أقولك حاجة عايزها …. وتستني

لحد ما يخلصوا الزوار

تحطي عنيكي في عنيه … تغني أحلى أغنيه

وتحكي معايا تبتسمي …. تقولي اسمي

وعوزاني أرد عليكي … ولكن كلها أحلام

وطول ما أنتي كدا جنبي ..

ما همك ليل بآلامه .. ولا همك مرار بنهار

***

وجات لحظة نطقت اسمك … وقلت : أمي

جريتي تقولي يا دنيا هنا اتلمي

تعالي طقطقي ودانك … واهتمي

لأحلى حروف … عرفها السمع والوجدان

نطقها ابني …. وقال : ماما

وصليتي على الهادي .. وقلتي خمسه وخميسه

في عيونكم يا حسادي

***

كبرت كبرت يا امي مع الأيام

وروحك طايره حواليه مع الأحلام

وعينك صاحيه ف عنيه ومش بتنام

وعقلك يمشي كام مشوار .. وقلبك يدعي ليل ونهار

تقولي : يا رب يا جبار .. …

أشوف ابني على حصان الهنا راكب

وحواليه السعاده ماشيه في مواكب

أشوفك يا بني سيد الناس

***

تبات الفكره في جفونك أمل دافي

وتصبح حب .. حنيه … نعيم صافي

ويكبر حلم أيامك

جدوره جوا وجدانك

بتشرب من بحور الصبر

وكلمه حلوه في لسانك

***

ويكبر عودي قدامك …. ويخضر الورق عندي

وأنتي …. تجف عيدانك

أقول الآه علشانك …. تداري عني أشجانك

وقلبك م التعب مطحون …. عشان راحتي

تقولي كل شيء بيهون

وقدامي بتبتسمي … وهمك في الفؤاد مدفون

***

في يوم العيد

هنا وزغاريد … من الفجريه فيي بيتنا

ولبس جديد

وعيديه .. وتهنيه ..

 ودعوه للجميع بالخير

وحضنك كله حنيه

وبسمه للضيوف داخلين … وبسمه للضيوف خارجين

وكل الناس أحبابك … زحمه وهيصه على بابك

وطول اليوم رحا دايره … على حسابك

وإيه نابك ؟!

ما فيش غير الهنا لينا

وبسمتنا هنا ليكي

***

أنا مش ناسي يا أمي .. أول يوم اسيب حضنك

رايح فيه لمدرستي

معايا قلمي وكراستي

وفرحي كبير بمريلتي

وفاكر لما وصيتي عليا الناس وطوب الأرض

وعينك مني بصالي بتزرعلي جناين ورد

ولما ارجع ألاقي لسانك بيرتل ىيات الحمد

يفوت العام وراه العام … وإصرارك مالهش حد

قلق سهران مع كتابي … وليل ونهار على بابي

تقابلي كل أصحابي … بكلمه حلوه في ودانا

ودفعه للحماس والجد

لحد ما تسمعي الأخبار

بأني شاطر الشطار

واسمي في الأول ينعد

تهنيني … تضميني

وتشكري الصمد الفرد

كأن اللي نجح أنتي … يا أول مدرسة للمجد

***

نجاحي كان يرجع لك شباب قلبك … من ناحيه

ومن ناحيه … كان بياخد من سنين عمرك

وتهتمي بأحوالنا … وسايبه للإله أمرك

لحد ما ربنا حقق أمانيكي… ونور بالأمل الأخضر لياليكي

وباتت ثمرة المجهود … وصبرك اللي مالهش حدود

شهادة بيها أتوظف

وآخد بين جنود الحق أعلى مكان

أنادي فيه باسم الله والأوطان

وأحقق رغبة الإنسان … في عيشه حره

مليانه أمان وحنان

***

في كل فجر يا أمي	أقوم م النوم على دعاكي
تناجي ربنا إني	أعيش متهني برضاكي
وألف مره تتمني	تتوه عين الشيطان عني
وأتعرف ببنت حلال	أعيش وياها متهني
وكل صباح تزفيني	وشايله بخور وترقيني
تقولي : يا ابني ريحني	اتجوز يلا فرحني

***

و اهو آن الأوان يا مّه	وجات الهيصه واللمه
كمان بات الوجود فرحان	وقلبك صلى وسمه
وكل الناس فرحتلي	وأنتي بالحنان طله
على عروستي توصيها	وقلبك والله ما خلا

***

وربيتي .. وعلمتي … وأهديتي … وسلمتي

سنين عمرك

وإحساسك .. ما ترجمتي

مافيش غير الدموع نازلين على خدودك

دموع الفرح … دموع الجرح

دموع والسلام نازلين… واحنا كمان مش حاسين

وتُهنا ويا فرحتنا …. حلاوة الدنيا ناستنا

ولكن أنتي بحنانك …. رسمتي جنه مليانه

نسيم … ونعيم … بطبع كريم ما خانك

بإيدك يا أمي صنعتي	عامل أمين يصنع
بإيدك يا أمي عملتي	جندي يشيل مدفع
بإيدك يا أمي غزلتي	أجمل نهار يطلع
بإيدك يا أمي عزفتي	لحن الوجود اللي خلا
صم الودان يسمع

***

الشُعرا مهما يقولوا	ويكتبوا عنك
ما يقدروش يوصفوا	ولا يعرفوا إنك
نبع الحنان اللي يدي	ما يخدش ولا مره
وعمره ما يشتكي	مهما الحياة مُرَّه

***

ربنا وصَّى عليكي	بالبر والرحمه
وقال إن رضاكي	نعيم يوم الزحمه
والدعوة منك توصل جنة الرحمان
في الدنيا أنتي نعيم	والآخره بر أمان

***

ومن هنا … من قلبنا … يا أمنا
نهديكي أحلى سلام
يا مدرستنا اللي فيها	عرفنا أحلى كلام
الله يكافئك عننا	بالصحة طول الأيام

ما رأيكم ؟!

تحياتي لك يا أستاذي

ابنك وتلميذك

علاء دياب